டென்மார்க்கிடமிருந்து கிரீன்லாந்து பனித்தீவை வாங்குவதற்கு அமெரிக்க ஜனாதிபதி ட்ரம்ப் விருப்பம் தெரிவித்துள்ளதாக தகவல்கள் வெளியாகியுள்ளன.
அமெரிக்க ஜனாதிபதி டொனால்ட் ட்ரம்ப் அடுத்த மாதம் டென்மார்க் செல்லவுள்ள நிலையிலேயே, அவர் கிரீன்லாந்து தீவை வாங்க விருப்பம் தெரிவித்துள்ளதாக தகவல்கள் வெளியாகியுள்ளன.
அமெரிக்க இராணுவத்திற்கு சொந்தமான விமானத்தளம் ஒன்று கிரீன்லாந்து தீவில் ஏற்கனவே செயற்பட்டு வருகிறது. நாட்டின் முக்கிய ரேடார் மையமாக இருக்கும் இந்த தளத்தில் 600 வீரர்கள் உள்ளனர்.
இதேபோன்று, 1946 ஆம் ஆண்டு அமெரிக்க ஜனாதிபதியாக இருந்த ஹாரி ட்ரூமன் 100 மில்லியன் அமெரிக்க டொலர்களுக்கு கிரீன்லாந்து தீவை வாங்க முற்பட்டார். எனினும் அவரது முயற்சி தோல்வியிலேயே நிறைவடைந்தது.
வடக்கு அட்லாண்டிக் மற்றும் ஆர்க்டிக் பெருங்கடல்களுக்கிடையே 8,11,000 சதுர மைல்கள் அளவிலான பரப்பை உள்ளடக்கியது கிரீன்லாந்து.
முற்றிலும் பனிப்பிரதேசமான இந்த தீவு டென்மார்க்கின் ஒரு தன்னாட்சி பிரதேசமாகும் என்பது குறிப்பிடத்தக்கது.
